Agjencia e Ushqimit dhe Veterinarisë asgjëson 19,200 kg mish pule të importuar nga Polonia

Prishtinë, 1 janar 2026 16:15

Agjencia e Ushqimit dhe Veterinarisë (AUV) ka njoftuar se janë asgjësuar 19 mijë e 200 kilogramë mish pule, pas konstatimit të pranisë së bakterit Salmonella spp në një ngarkesë të importuar nga Polonia.

Sipas AUV-së, mishi i pulës ishte importuar nga kompania APETIT Sh.p.k. nga Vushtrria, ndërsa asgjësimi është bërë në përputhje me procedurat ligjore dhe standardet e sigurisë ushqimore.

Komunikata:

Prishtinë, 31 dhjetor 2025

AUV asgjëson 19200 kg mish pule

Agjencia e Ushqimit dhe Veterinarisë (AUV) njofton opinionin publik se, me kërkesë të kompanisë APETIT dhe në kuadër të kontrollit zyrtar të realizuar nga inspektorët e AUV-së, në një ngarkesë të mishit të pulës të importuar nga Polonia, nga kompania APETIT Sh.p.k., Vushtrri, është konstatuar prania e bakterit Salmonella spp.

Menjëherë pas konstatimit të këtij rasti, sasia e përgjithshme prej 19,200 kg mish pule është asgjësuar, në përputhje të plotë me procedurat ligjore në fuqi dhe standardet e sigurisë ushqimore.

Agjencia e Ushqimit dhe Veterinarisë vazhdon të monitorojë situatën me vëmendje të shtuar dhe të bashkëpunojë ngushtë me institucionet vendore dhe ndërkombëtare, si dhe me operatorët ekonomikë që merren me importin e mishit, me qëllim të identifikimit dhe parandalimit të rasteve të ngjashme.

AUV mbetet e përkushtuar në garantimin e sigurisë ushqimore dhe në ofrimin e produkteve që janë në përputhje me standardet evropiane, për mbrojtjen e shëndetit të konsumatorëve.