Prishtinë, 24 dhjetor 2025 17:39
Në prag të zgjedhjeve të parakohshme parlamentare në Kosovë, Serbia ka njoftuar sot hapjen e konkursit për 300 vende pune në institucionet paralele të saj shëndetësore që veprojnë në Kosovë, si dhe vazhdimin e një procesi tjetër prej 50 vendeve të punës, që kishte filluar më 22 dhjetor. Me këtë, sipas njoftimit zyrtar të Ministrisë së Shëndetësisë së Serbisë, 350 vende të reja pune do të mbushen në sistemin serb të kujdesit shëndetësor në Kosovë, duke u prezantuar si një “gara për punësim” që do të sigurojë jetesën dhe mbijetesën e komunitetit serb.
Në njoftim theksohet gjithashtu se në gjysmën e dytë të janarit, 700 persona të tjerë – mjekë, infermierë dhe stafe jomjekësore – do të hyjnë në punë përmes një konkursi të mëparshëm, duke theksuar se vetëm në tre vitet e fundit mbi 1,500 punëtorë janë punësuar në këto struktura. Autoritetet serbe shpjegojnë se këto masa synojnë modernizimin e kujdesit shëndetësor dhe forcimin e institucioneve të tyre, si pjesë e kujdesit shtetëror për komunitetin serb jashtë territorit të vet.
Por gjykuar nga konteksti politik në rajon, veprimi është perceptuar nga faktorë të tjerë si një lëvizje që shkon përtej problemeve të punësimit. Kosova është në prag të zgjedhjeve të parakohshme parlamentare, dhe çështja e rolit të Serbisë në komunitetet me shumicë serbe në veri të vendit ka qenë një pikë e ndjeshme debati për muaj me radhë. Analistët lokalë dhe ndërkombëtarë kanë paralajmëruar për vite lidhur me funksionimin e institucioneve “paralele” të Serbisë në Kosovë, të cilat Prishtina i ka konsideruar shpesh si shkelje të sovranitetit dhe të rendit kushtetues të Republikës së Kosovës.
Që në zgjedhjet lokale të tetorit 2025, autoritetet e Kosovës dhe zyrtarë evropianë kanë akuzuar qeverinë e Beogradit për ndërhyrje në procese zgjedhore, duke përfshirë premtime për punësime, përfitime sociale dhe ndikim politik te komuniteti serb. Raportuesi i Parlamentit Evropian për Kosovën e përshkroi këtë lloj veprimi si interferencë të drejtpërdrejtë në zgjedhjet vendore, duke bërë thirrje që autoritetet serbe të ndalojnë çdo fushatë të këtij lloji dhe të lejojnë votuesit e Kosovës të vendosin lirshëm.
Në këtë kontekst, njoftimi i sotëm për punësime jo thjesht shihet si një hap drejt fuqizimit të shëndetësisë për minoritetin serb, por edhe si një instrument i mundshëm politik, që mund të ndikojë në perceptimin e besnikërisë ndaj Listes serbe.
Kritikët tani pyeten: A janë këto vende pune një mundësi reale socio-ekonomike, apo një mjet për mobilizimin e votuesve dhe konsolidimin e influencës së Serbisë në prag të një gare kyçe elektorale?
