Prishtinë, 19 dhjetor 2025
Kryeministri në detyrë i Republikës së Kosovës, Albin Kurti, ka theksuar se zhvillimi ekonomik dhe institucional i vendit është rezultat i drejtpërdrejtë i luftimit të krimit dhe korrupsionit, duke prezantuar disa nga investimet dhe arritjet kryesore të mandatit qeveritar.
Sipas Kurtit, Qeveria do të investojë 3.2 milionë euro për ndërtimin e rrugës Malishevë–Kijevë, një projekt i rëndësishëm infrastrukturor për lidhjen dhe zhvillimin e kësaj zone. Paralelisht, Operatori i Sistemit të Transmetimit dhe Tregut të Energjisë Elektrike (KOSTT) ka nënshkruar kontratën për ndërtimin e nënstacionit energjetik për Malishevën, në vlerë prej 6.7 milionë euro.
Ai ka theksuar se këto investime nuk janë të izoluara, por pjesë e një procesi të zhvillimit të gjithmbarshëm që po shtrihet në të gjitha komunat e Kosovës gjatë këtij mandati qeveritar.
“Krejt këto investime, për Malishevën e kudo në Kosovë, janë rrjedhshmëri e zhvillimit të gjithmbarshëm në këtë mandat qeveritar. Progresi është i mundur kur e luftojmë krimin dhe korrupsionin,” ka deklaruar Kurti.
Kryeministri në detyrë ka vënë në pah edhe përmirësimet në tregun e punës, duke theksuar se numri i të punësuarve është rritur nga 350 mijë në 435 mijë persona, ndërsa shkalla e papunësisë ka rënë nga 26 për qind në më pak se 11 për qind.
Në këtë kontekst, Kurti ka shtuar se arsimi po lidhet gjithnjë e më shumë me tregun e punës, me synimin që çdo diplomë shkollore të shoqërohet me mundësi reale punësimi.
Duke folur për situatën e sigurisë dhe sundimit të ligjit, ai ka theksuar se në veri të vendit janë mbyllur 29 rrugë ilegale, janë shuar komunat dhe zyrat paralele, është ndalur përdorimi i dinarit si dhe është ndërprerë prodhimi ilegal i kriptovalutave.
“Çdo cep i shtetit frymon ndryshe në katërvjeçarin e fundit,” ka theksuar Kurti, duke shtuar se Qeveria synon të vazhdojë në të njëjtin drejtim edhe pas 28 dhjetorit, për më shumë siguri dhe begati për të gjithë qytetarët e Kosovës.
