Krasniqi: Kryetarët e komunave veriore i kanë të vendosur flamurin dhe fotografinë e Presidentes së Kosovës në zyra

Prishtinë 9 Dhjetor 2025. 18:05

Kryetarët e komunave Mitrovicë e Veriut, Leposaviq, Zubin Potok dhe Zveçan kanë vendosur në zyrat e tyre flamurin e Republikës së Kosovës dhe fotografinë e Presidentes së vendit.

Këtë e ka bërë të ditur ministri në detyrë i Administrimit dhe Pushtetit Lokal, Elbert Krasniqi, në një përgjigje për televizionin Tëvë1.

Krasniqi ka nënvizuar se transferimi i pushtetit në këto komuna është realizuar në pajtim me Kushtetutën e Republikës së Kosovës dhe me legjislacionin në fuqi për vetëqeverisjen lokale.

“Ministria e Administrimit të Pushtetit Lokal (MAPL), konform mandatit të saj, ka monitoruar mbledhjet inaugurale në komunat Mitrovicë e Veriut, Leposaviq, Zubin Potok dhe Zveçan. Transferimi i pushtetit në këto komuna është realizuar në pajtim me Kushtetutën e Republikës së Kosovës dhe me legjislacionin në fuqi për vetëqeverisjen lokale. Në komunikimin zyrtar dhe jozyrtar që MAPL ka zhvilluar, është konstatuar se kryetarët e komunave Mitrovicë e Veriut, Leposaviq, Zubin Potok dhe Zveçan, në zyrat e tyre, i kanë të vendosura flamurin e Republikës së Kosovës dhe fotografinë e Presidentes së Republikës së Kosovës”, ka thënë Krasniqi.

Sipas tij, pas inaugurimit dhe marrjes së mandatit, kryetarët e rinj kanë filluar ushtrimin e detyrave me të gjitha kompetencat që u garantohen me Kushtetutë dhe ligjet në fuqi.

Krasniqi ka theksuar se Ministria e Administrimit të Pushtetit Lokal është e gatshme të bashkëpunojë me ta për të garantuar ofrim më të mirë të shërbimeve për qytetarët e këtyre komunave.

“Pas marrjes së mandatit, kryetarët e këtyre komunave kanë të drejtë të ushtrojnë funksionet e tyre, ndërsa MAPL ka shprehur gatishmërinë për bashkëpunim me ta, me qëllim të ofrimit të shërbimeve sa më cilësore për qytetarët e këtyre komunave”, ka theksuar ai.