Pas rikthimit të Listës Serbe, Adriana Hoxhiç ushtron presion për gjuhën serbe ndaj punonjësve të administratës në Komunën e Mitrovicës së Veriut

Mitrovicë e Veriut, 09 dhjetor 2025 11:46

Pas rikthimit të Listës Serbe në pushtet në komunat e veriut të Kosovës, në opinion janë shfaqur informacione se në disa institucione lokale kanë filluar presionet e para ndaj të punësuarve, veçanërisht ndaj atyre që nuk e flasin gjuhën serbe. Sipas pohimeve të disa punonjësve, përmendet edhe mundësia e largimeve nga puna nëse brenda një afati të shkurtër nuk përvetësojnë komunikimin bazik në gjuhën serbe.

Më së shumti reagime ka shkaktuar emri i Adrianës Hoxhiç, e cila, sipas pretendimeve të bashkëbiseduesve, po dallohet për qasje të ashpër dhe nganjëherë arrogante ndaj stafit administrativ. Disa punonjës pohojnë se bisedat zhvillohen në një atmosferë frike dhe pasigurie, ndërsa të tjerë besojnë se bëhet fjalë për një përpjekje për të vendosur “disiplinë dhe efikasitet” pas ndryshimit të udhëheqjes.

Veritasinfo ka provuar të kontaktojë në telefon nënkryetaren e Komunës së Mitrovicës së Veriut, Adriana Hoxhiç, lidhur me këto pretendime, por nuk e ka hapë telefonin.

Ndërkaq, edhe Zyrës për Informim i janë dërguar pyetje lidhur me pohimet, por as kjo zyrë nuk ka kthyer përgjigje.

Deri tani nuk ka asnjë konfirmim zyrtar për largime nga puna, e as komente nga komunat, por punonjësit e Komunës së Mitrovicës së Veriut thonë se sjellja e udhëheqjes së re është mjaft e çuditshme. Ata shtojnë se do ta përcjellin situatën, ndërsa pretendimet e mundshme i vlerësojnë si të qëllimshme, por jo të rrezikshme. Gjithashtu, ata theksojnë se rrallë takohen me udhëheqësit e rinj, pasi këta shpesh mbyllen nëpër zyra dhe nuk dalin shumë shpesh.

Çështja e përdorimit të gjuhëve në institucionet e veriut të Kosovës po kthehet sërish si temë e ndjeshme, sidomos në mjedise ku komunitetet serbe dhe shqiptare varen nga njëra-tjetra në punën e përditshme.