Ujësjellësi “Mitrovica” anulon konkursin e mëparshëm dhe hap të ri për 84 vende pune në veri – aplikimet deri më 21 korrik

Ujësjellësi Rajonal “Mitrovica” ka anuluar konkursin e shpallur më 19 maj për punësim në Mitrovicën e Veriut, Zveçan dhe Zubin Potok dhe sot ka hapur një konkurs të ri – kësaj here për gjithsej 84 vende pune në 19 profile të ndryshme. Konkursi është i hapur nga data 1 deri më 21 korrik. Kushtet kanë mbetur të njëjta, ndërsa përparësi kanë kandidatët që flasin gjuhën serbe.

Konkursi i mëparshëm është anuluar për shkak të interesimit të ulët nga komuniteti serb. Konkursi i ri përfshin më shumë pozita dhe numër më të madh të vendeve të punës, me qëllim të rritjes së pjesëmarrjes dhe përfaqësimit të barabartë të banorëve lokalë.

Pozitat që kërkohen përfshijnë: pastrues/e, roje, arkëtarë, shefa të mirëmbajtjes së rrjetit të ujit dhe kanalizimit, punëtorë fizikë, punëtorë për mirëmbajtjen e kanalizimit, shoferë me kategori C, hidraulikë, ekskavatoristë, inxhinierë të hidroteknikës, dispeçerë, teknikë për dozimin, tornitorë/teknikë makinerikë, laborantë, udhëheqës të shërbimeve të matjes dhe pagesës, si dhe kontrollorë.

Kandidatët e interesuar mund të gjejnë formularin e aplikimit në faqen zyrtare të ndërmarrjes. Aplikimi bëhet në mënyrë elektronike, ndërsa dokumentacioni i nevojshëm (CV, diploma përkatëse, vërtetim që personi nuk është nën hetim – jo më i vjetër se 6 muaj, dëshmi për përvojë pune, kopje e letërnjoftimit të Kosovës) duhet të dërgohet i skanuar ose në format PDF në email adresën: [email protected].

Të gjitha detajet rreth kushteve të aplikimit janë të publikuara në uebfaqen zyrtare të Ujësjellësit Rajonal “Mitrovica”.