Publikohen detajet rreth pritës ku u vra Mujë Krasniqi: Organizatori jeton në Serbi

Prishtinë, 17 nëntor 2025 14:47

Në vendin e quajtur “Te Liqenet” të Hasit në Gorozhup të Pashtrikut, është ngritur një pllakë përkujtimore në nderim të një çifti bashkëshortor – të rënë heroikisht në luftën për lirinë e Kosovës.

Hysen Bujupaj dhe Luljeta Shala u vranë në një pritë të organizuar nga forcat serbe, më 13 dhjetor të vitit 1999.

Bashkë me ta ishte edhe komandanti Mujë Krasniqi, i shoqëruar nga 41 luftëtarë të Ushtrisë Çlirimtare të Kosovës – të gjithë sot dëshmorë të lirisë.

Një nga bashkëorganizatorët e kësaj prite përmendet të ketë qenë Enver Malush Krasniqi, nga Korisha e Prizrenit, ish-oficer i lartë i ushtrisë serbe.

Esat Shala – person që ruan një numër të madh materialesh filmike e fotografike të masakrave, ngjarjeve dhe luftës në Kosovë – në një paraqitje publike në llogarinë e tij në Facebook ka hedhur akuza ndaj ish-oficerit me prejardhje shqiptare, për, siç shprehet ai, pritën e organizuar dhe vrasjen në këtë kurth të Mujë Krasniqit, motrës së tij Luljetës, dhëndrrit Hysenit dhe pjesëtarëve të tjerë të grupit.

“Tradhtari i cili e çoi në pritë Muj Krasniqin –
Enver Malush Krasniqi nga Korisha e Prizrenit, oficer i lartë në ushtrinë serbe, i cili e çoi në pritë grupin e Muj Krasniqit, dhe i njëjti mori pjesë në këtë pritë. Ky person sot jeton në shtetin serb. Ka shumë për të thënë për këtë rast, por ne nuk do të heshtim, sepse në këtë grup është vrarë motra ime së bashku me të fejuarin Luanin.
Në këtë foto jam unë pranë pllakës së motrës dhe dhëndrrit, në vendin e rënies në malet e Pashtrikut”, ka shkruar Esat Shala në Facebook.