Rashiq: Do ta mbështes Qeverinë Kurti 3

Prishtinë, 22 tetor 2025

Nenad Rashiq, nëndëskryetar i sapozgjedhur i Kuvendit të Kosovës, në një deklaratë për “Front Online” ka konfirmuar se do ta mbështes Qeverinë Kurti 3.

Rashiq ka shprehur gatishmërinë e subjektit që ai përfaqëson për të vazhduar bashkëpunimin me kryeministrin e Kosovës, Albin Kurti.

“Nuk kemi biseduar ditëve të fundit, por më herët kemi folur për një bashkëpunim sa më të gjerë dhe normal, me gatishmëri për bashkëpunim dhe me vullnet pozitiv të subjektit që përfaqësoj për ta vazhduar atë,” ka thënë Rashiq.

Ai shtoi se pret komunikim shtesë me kryeministrin para seancës së 26 tetorit.

“Besoj se para datës 26 do të kemi edhe një komunikim tjetër. Natyrisht, vota ime për qeverinë Kurti është për shkak të konceptit që ai ka paraqitur që në fillim — që nuk do të ketë bashkëpunim me Listën Serbe. Edhe ne ndajmë të njëjtin parim, prandaj ekziston hapësirë për bashkëpunim ndërmjet nesh,” ka deklaruar Rashiq.

Afati kushtetues për paraqitjen e qeverisë së Kosovës skadon më 26 tetor.