Rashiq: Lista Serbe shpërndau para dhe kontrata pune për vota në Graçanicë

Prishtinë, 14 tetor 2025

Nënkryetari i Kuvendit të Kosovës nga komuniteti serb dhe kryetari i partisë “Për Liri, Drejtësi dhe Mbijetesë”, ka thënë se Lista Serbe ka përdorur krejt mekanizmat përfshirë edhe pagesën për  votë.

Rashiq ka thënë se në komunën e Graçanicës janë dhënë para dhe ofruar kontrata pune.

Ai ka thënë se qytetarët serb edhe frikësohen e shantazhohen nga Lista Serbe.

“Të shtunën janë nënshkruar kontrata pune të përkohshme në shëndetësi. Të shtunën gjatë ditës dhe në mbrëmje ka qenë një inovacion të ofrimit të kontratave, 20 mijë dinarë. Kjo është mashtrim. Në Graçanicë ka pas së paku 3 mijë votues të rinj , organizim kolektiv të votuesve nga Serbia, kemi pas metodologji të vrazhdë nga institucionet që udhëhiqen nga Serbia” ka thënë Rashiq në emisionin “Mesditë” në Tëvë 1.

Rashiq ka thënë se si parti kanë pasur ambicie që në komunat në jug të Kosovës të shkojnë në raundin e dytë.

“Kemi pas do ambicie që në jug mund të jemi pjesë e balotazhit, sepse në veri e kemi ditur ka një koncept që sikurse  njerëzit janë peng dhe po manipulohen më lehtë. Kur e keni një oponent  kaq të fuqishëm që përdor krejt mekanizmat që kanë dhënë para, organizim”, ka thënë ai.