Beogradi mbështet akuzat ruse për ndërhyrjen e Brukselit në protesta

Beograd 18 Shtator 2025

Protestë në Beograd, në sheshin Slavija, me thirrjen e studentëve në bllokadë, 15 mars 2025.

Akuzat e Kremlinit kundër Bashkimit Evropian (BE), por pa prova.

Kjo është mesazhi kryesor i shërbimeve ruse të inteligjencës, të cilat akuzojnë Bashkimin dhe vendet anëtare të tij se qëndrojnë pas demonstratave antiqeveritare në Serbi.

Ndërsa më 1 nëntor shënohet përvjetori i vdekjes së 16 personave në një aksident që ndezi protestat masive, mijëra demonstrues që kërkojnë përgjegjësi nga pushteti, Kremlini i sheh si “trushpëlarë”.

Në një komunikatë të Shërbimit të Inteligjencës së Jashtme të Rusisë (SVR) më 15 shtator, thuhet se është në veprim “veprimtaria nënversive” e Brukselit.

Studentët në bllokadë të fakulteteve, të cilët udhëheqin protestat, përshkruhen si “rinia që po radikalizohet” dhe që “po kalon nga protesta paqësore drejt metodave ‘revolucionare’ të luftës dhe dhunës”.

“Qëllimi i rrymës liberale evropiane është që në pushtet, në këtë vendin më të madh ballkanik, të sjellë një udhëheqje të bindur e besnike ndaj Brukselit”, ka porositur SVR-ja.

Ivana Strander, bashkëpunëtore e Fondacionit për Mbrojtjen e Demokracisë nga Uashingtoni, vlerëson se Kremlini vazhdon mbështetjen për regjimin e presidentit Aleksandar Vuçiq, i cili tash tri vjet refuzon të vendosë sanksione ndaj Rusisë për shkak të pushtimit të Ukrainës.

“Presidenti rus Vladimir Putin e përdor Ballkanin për të anashkaluar sanksionet dhe për të financuar makinerinë e tij të luftës. Po ashtu, Putinit i përshtatet kaosi në Ballkan, dhe Vuçiq e ndihmon në këtë”, vlerëson ajo.