Publikohet aktgjykimi i plotë i Kushtetueses për rastin e Kuvendit

Prishtinë, 18 gusht 2025

Gjykata Kushtetuese e Kosovës ka publikuar aktgjykimin e plotë në lidhje me konstituimin e Kuvendit, duke qartësuar procedurat dhe afatet që duhet të respektohen nga deputetët.

Përmbajtja e seancës konstituive

Në aktgjykim theksohet se rendi i ditës i seancës konstituive është i përcaktuar rreptësisht nga Rregullorja e Kuvendit. Ai përfshin vetëm:

1. Formimin e Komisionit të Përkohshëm për Verifikimin e Kuorumit dhe të Mandateve;

2. Betimin e deputetëve;

3. Zgjedhjen e Kryetarit të Kuvendit;

4. Zgjedhjen e nënkryetarëve të Kuvendit.

Gjykata ka nënvizuar se ky rend i ditës është i vetmi që mund të trajtohet në seancën konstituive dhe se kryesuesi i seancës nuk ka të drejtë të devijojë apo të lejojë ndërhyrje procedurale që bien ndesh me Kushtetutën.

Afati për zgjedhjen e Kryetarit të Kuvendit

Me publikimin e këtij aktgjykimi më 18 gusht 2025, ka nisur të rrjedhë afati 30-ditor brenda të cilit deputetët duhet të zgjedhin kryetarin e Kuvendit përmes votimit të hapur. Sipas Kushtetueses, deri më 18 shtator Kuvendi duhet të jetë i konstituuar.

Gjykata po ashtu ka shpallur të pavlefshme seancat e mbajtura në periudhën 27 qershor – 26 korrik 2025, duke theksuar se ato nuk kanë respektuar vendimin e saj të mëparshëm të datës 26 qershor.

Kërkesa për përjashtim e gjyqtarit Llaban

Në aktgjykim zbulohet se më 7 gusht 2025, gjyqtari Radomir Llaban kishte kërkuar vetëpërjashtimin nga vendimmarrja në tri raste të lidhura me seancën konstituive (KO193/25, KO196/25 dhe KO215/25), të cilat ishin parashtruar nga PDK, LDK dhe presidentja Vjosa Osmani. Kërkesa e tij u refuzua njëzëri nga gjykata.

Presidentja Osmani, më 5 gusht, kishte tërhequr kërkesën e saj nga Gjykata Kushtetuese, duke deklaruar se emërimi i gjyqtarit Llaban si raportues përbënte rrezik për rendin kushtetues. Ajo ka theksuar se institucionet e sigurisë në Kosovë kishin dorëzuar informacione për veprimtarinë e tij në vitet 2018, 2021 dhe 2024.

Akuzat ndaj gjyqtarit Llaban

Ministrja në detyrë e Drejtësisë, Albulena Haxhiu, në një konferencë për media, e ka akuzuar Llabanin se është bashkëpunëtor i shërbimit sekret serb (BIA) dhe i afërt me Milan Radoiçiqin. Sipas saj, gjyqtari ka qenë i përfshirë edhe në planin e Serbisë për ndërhyrje në zgjedhjet në Kosovë.

“Llaban ka pasur raporte të hershme me Milan Radoiçiqin, kryeterroristin e rastit në Banjska, dhe falë këtyre lidhjeve ka përfituar prona dhe punësime për familjarët e tij,” ka deklaruar Haxhiu.

Vendimi përfundimtar i Kushtetueses

Më 8 gusht 2025, Gjykata Kushtetuese mori vendim që deputetët e dalë nga zgjedhjet e 9 shkurtit duhet të zgjedhin kryetarin e Kuvendit me votim të hapur, brenda afatit 30-ditor. Po ashtu, vendimi i përcakton se të gjitha seancat e mbajtura pas 26 qershorit janë të pavlefshme.

Ky aktgjykim i ri pritet t’i japë fund bllokadës institucionale dhe t’i hapë rrugë konstituimit të Kuvendit dhe funksionimit normal të institucioneve të Kosovës.