Kurti njofton për projekte infrastrukturore në Viti, përfshirë rrugën për Stubëll

16 gusht, 2025

Kryeministri në detyrë, Albin Kurti, ka njoftuar se Ministria e Mjedisit, Planifikimit Hapësinor dhe Infrastrukturës (MMPHI) ka realizuar ose është në proces të realizimit të katër projekteve të rëndësishme rrugore në komunën e Vitisë.

“Rruga alternative për Stubëll, nga rruga Anton Çeta deri te rruga Sejdiu, është njëri nga katër projektet që Ministria e Mjedisit, Planifikimit Hapësinor dhe Infrastrukturës i ka realizuar ose po i realizon në komunën e Vitisë”, ka shkruar Kurti në Facebook.

Sipas tij, projektet e tjera rrugore në këtë komunë përfshijnë rrugën Viti – Korbliç – Kaçanik, rrugën për Mjak dhe Debelldeh, si dhe rrugën e Vërnakollës.

Vlera e investimit për rrugën alternative për Stubëll është 822,858 euro, ndërsa vlera totale e investimeve në infrastrukturën rrugore në komunën e Vitisë nga MMPHI gjatë këtij mandati kalon 8 milionë euro.

Kurti ka vlerësuar se kjo rrugë e bën më të lehtë dhe më të sigurt qarkullimin e banorëve të Stubëllës dhe fshatrave përreth, si edhe të vizitorëve të shumtë që vijnë për shkak të rëndësisë historike e kulturore të fshatit. Në Stubëll ndodhet edhe shkolla e parë shqipe në Kosovë, si dhe objekte të tjera të trashëgimisë kulturore.