Mitrovica në ritmin e artit dhe aktivizmit – ka nisur edicioni i 15-të i Green Fest

Gusht, 2025

Që nga 13 gushti, Mitrovica po jeton në një atmosferë krejtësisht të veçantë. Rrugët, sheshet dhe hapësirat kulturore të qytetit janë shndërruar në një skenë të gjallë ku takohen arti, muzika, kultura dhe aktivizmi mjedisor. Edicioni i 15-të i Green Fest 2025 ka nisur me energji të re dhe me një mision të qartë: të ndërgjegjësojë individët dhe komunitetet për çështje të rëndësishme mjedisore e sociale, duke i lidhur me fuqinë transformuese të artit.

Tema e këtij viti – “Toksiciteti” – fton publikun në një reflektim të gjerë mbi ndikimin e ndotjes kimike në mjedis, shëndetin publik dhe marrëdhëniet shoqërore. Përmes një programi pesëditor, festivali ofron një përzierje të aktiviteteve edukative, artistike dhe argëtuese, të menduara për të gjitha grupmoshat.

Çdo mëngjes, pjesëmarrësit kanë mundësinë të ndjekin punëtorinë e gazetarisë mjedisore, ku mësojnë si të hulumtojnë dhe raportojnë mbi çështjet e mjedisit. Pasditet sjellin Green Talks, diskutime të hapura mbi ndotjen kimike dhe shëndetin mendor në qytetet industriale, ku zëra nga fusha të ndryshme ndajnë përvoja dhe ide. Ndërkohë, fëmijët po shijojnë hapësirat e tyre krijuese përmes Green Kids, duke mësuar për natyrën nëpërmjet lojës dhe artit.

Mbrëmjet e Mitrovicës janë kthyer në një festë të madhe muzikore. Artistë të njohur si Armend Rexhepagiqi, Yll Limani, Gipsy Groove, Offchestra, La Fazani, Ahmet Kilic, DJ Wise dhe shumë të tjerë po sjellin performanca që mbushin qytetin me ritëm dhe energji pozitive.

Por Green Fest nuk është vetëm muzikë. Programi përfshin edhe aktivitete në natyrë si kajak, çiklizëm, yoga dhe ecje malore, duke i afruar pjesëmarrësit me mjedisin që festivali synon ta mbrojë. Ekspozita “Land Like You”, dokumentari “Sky Above Zenica” dhe performancat e trupës së baletit po ofrojnë momente reflektimi mbi ndotjen, ndikimin e njeriut në planet dhe mundësitë për ndryshim.

Organizuar nga “7Arte” në bashkëpunim me Komunën e Mitrovicës, Ministrinë e Kulturës dhe programin EECSOK të mbështetur nga SIDA, festivali është shndërruar në një platformë ku bashkëpunojnë artistë, aktivistë dhe qytetarë nga komunitete të ndryshme.

Ceremonia e mbylljes do të mbahet në Kodrën e Minatorëve në Mitrovicën e Veriut, duke përcjellë një mesazh të fuqishëm uniteti përmes artit dhe mjedisit.

Për programin e plotë dhe më shumë detaje, mund të vizitoni: www.mitrovicagreenfest.com.