Protesta në gjithë Serbinë – qytetarët kërkojnë zgjedhje të parakohshme dhe drejtësi

Rrugët e Beogradit prej muajsh nuk pushojnë – protestat janë bërë përditshmëri. Qytetarë, studentë, profesorë e pensionistë, çdo ditë kërkojnë ndryshime politike, drejtësi dhe përgjegjësi.

Shkak për tubimin e fundit ishte përkujtimi i viktimave të tragjedisë në Novi Sad, kur shembja e një strehe në stacionin hekurudhor u mori jetën 16 personave. Pjesëmarrësit e konsiderojnë këtë fatkeqësi si pasojë të korrupsionit sistematik, paaftësisë institucionale dhe ndikimit politik. Ecjet paqësore dhe bllokadat janë shndërruar në formë të rezistencës qytetare.

“Kam bërë një pankartë me mesazhin se një ditë, si popull, do ta shkatërrojmë korrupsionin në këtë vend”, tha një studente.

“Pres që të ndodhë drejtësia dhe secili të marrë atë që i takon. Vetëm ligji – kjo na duhet, dhe gjithçka do të jetë në rregull”, tha një student tjetër.

Protesta po mbahen anembanë Serbisë, me kërkesë për shpërndarjen e Parlamentit, shpalljen e zgjedhjeve të parakohshme dhe lirimin e protestuesve të arrestuar. Qytetarët thonë se po luftojnë për një vend ku fëmijët e tyre do të dëshirojnë të jetojnë.

“Presim shpalljen e zgjedhjeve dhe të shohim më në fund largimin e këtij regjimi. Kjo është e gjitha. Askush nuk e duron më këtë gjendje”, tha një qytetare.

“Unë personalisht pres që ky regjim të bjerë – duhej të kishte rënë para gjashtë muajsh, por as tani nuk është vonë”, tha një qytetar.

“Duam zgjedhje, kjo është kryesorja. Pastaj, të dënohen të gjithë ata që mbajnë përgjegjësi për tragjedinë në Novi Sad, të plotësohen kërkesat e studentëve dhe të lirohen të gjithë studentët e arrestuar”, tha një qytetare tjetër.

Prej muajsh, atmosfera në Serbi është e tensionuar. Pavarësisht represionit, arrestimeve dhe përpjekjeve për frikësim, qytetarët mbeten të vendosur. Ata thonë se ndryshimet nuk vijnë brenda natës, prandaj mbeten në rrugë – sepse, sipas tyre, beteja për drejtësi është e përditshme dhe e përbashkët.