Kushtetuesja del me sqarim lidhur me reagimet për gjyqtarin, Radomir Laban

Prishtinë, 06 Gusht 2025

Gjykata Kushtetuese e Kosovës ka reaguar pas debatit të krijuar për gjyqtarin serb Radomir Laban, në lidhje me një kërkesë të tërhequr nga Presidentja e Kosovës, Vjosa Osmani.

Presidentja Osmani të martën tërhoqi kërkesën që e kishte dorëzuar dy javë më parë në Gjykatën Kushtetuese, ku kërkonte sqarim për pasojat juridike në rast të moskonstituimit të Kuvendit brenda afatit 30-ditor. Në një konferencë për media, ajo sqaroi se e ndërmori këtë veprim pasi gjykata caktoi gjyqtarin Radomir Laban si raportues të çështjes. Sipas Osmanit, bazuar në të dhëna nga institucionet e sigurisë, Laban përbën rrezik për rendin kushtetues të vendit.

Në reagimin e saj, Gjykata Kushtetuese theksoi se ndarja e lëndëve tek gjyqtarët bëhet sipas rregullave procedurale dhe se vendimet merren nga trupi i plotë i gjykatës.

“Gjykata është organ kolegjial dhe vepron në përbërje të plotë. Palët kanë të drejtë të tërheqin kërkesat e tyre, të cilat shqyrtohen në përputhje me Kushtetutën, Ligjin për Gjykatën Kushtetuese dhe Rregulloren e punës”, thuhet në njoftim.

Lidhur me gjyqtarin Laban, Gjykata sqaroi se ai punon aty që nga viti 2011 si këshilltar juridik, ndërsa që nga 9 gushti 2018 ushtron funksionin e gjyqtarit, pasi ka kaluar të gjitha procedurat kushtetuese dhe ligjore për emërim — me propozim të Kuvendit dhe dekretim nga Presidenti.

“Procedurat për shkarkimin e gjyqtarëve janë të përcaktuara qartë në Kushtetutë. Gjykata trajton çdo kërkesë me paanshmëri dhe profesionalizëm, në përputhje me mandatin kushtetues”, thuhet më tej në reagim.