Rezolutë për dhunën ndaj grave, kërkohet hetim parlamentar për rastin Zekaj

Prishtinë, 27 tetor 2026 07:36

Kuvendi i Kosovës ka miratuar me 67 vota për rezolutën për vrasjen e Arlinda Zekajt në Vitomiricë të Pejës dhe parandalimin e dhunës ndaj grave dhe fëmijëve.

Rezoluta kërkon themelimin e një komisioni hetimor parlamentar për të shqyrtuar përgjegjësitë institucionale në rastin e Zekajt, përfshirë trajtimin e denoncimeve dhe zbatimin e masave mbrojtëse.

Ndër masat e parapara janë krijimi i qendrave shtetërore për strehimin e grave dhe fëmijëve viktima të dhunës, forcimi i ndihmës juridike falas, programet edukative për parandalimin e dhunës dhe shërbimet psikosociale për personat me histori të dhunshme.

Po ashtu, kërkohet ndryshimi i legjislacionit për përcaktimin e femicidit si vepër të veçantë penale, krijimi i një njësie të specializuar në Policinë e Kosovës për trajtimin e dhunës digjitale dhe themelimi i qendrave për viktimat e dhunës seksuale.

Rezoluta parasheh që brenda 72 orëve të verifikohen rastet aktive me rrezik të lartë dhe të ndahen statistikat për dhunën në familje, me qëllim hartimin e një udhëzuesi të përbashkët për trajtimin e rasteve.

Gjatë seancës, kryetarja e Kuvendit, Albulena Haxhiu, kritikoi deputetët që nuk qëndruan në sallë për të votuar, duke theksuar se nuk ka kuptim të bëhen akuza dhe të mos merret pjesë në votim.