Osmani tërheq kërkesën nga Kushtetuesja për shkak të gjyqtarit Llaban

Osmani tërheq kërkesën nga Kushtetuesja për shkak të gjyqtarit Llaban

Presidentja e Kosovës, Vjosa Osmani, ka tërhequr kërkesën për interpretim kushtetues lidhur me seancën konstituive të Kuvendit, pasi Gjykata Kushtetuese caktoi gjyqtarin Radomir Laban si raportues të çështjes.

Në deklaratën e saj, Osmani tha se gjyqtari Laban është përmendur në raportet e institucioneve të sigurisë si person që përbën kërcënim për sigurinë kombëtare të Kosovës dhe ka qenë i përfshirë në veprimtari kundër rendit kushtetues në vitet 2018, 2021 dhe 2024. Ajo theksoi se këto informacione i janë përcjellë më herët edhe vetë Gjykatës Kushtetuese.

“Caktimi i një gjyqtari me të tilla akuza në një rast kaq të ndjeshëm është i papranueshëm dhe cenon besueshmërinë e institucionit,” tha Osmani, duke shtuar se gjyqtari raportues ka rol kyç në vlerësimin e pranueshmërisë dhe meritave të një kërkese.

Ajo kritikoi edhe mënyrën e ndarjes së rasteve në Gjykatë, duke theksuar se kryetari ka diskrecion të plotë për caktimin e gjyqtarëve, çka sipas saj e bën edhe më problematike këtë vendim.

Presidentja kujtoi se edhe Ministria e Drejtësisë kishte refuzuar më parë emërimin e Labanit si noter për shkak të të njëjtave raporte të sigurisë.

“Tërheqja e kërkesës ishte e domosdoshme për të mbrojtur integritetin e procesit kushtetues,” përfundoi Osmani.