Kosova në fokus të investitorëve globalë, Pacolli prezanton potencialin për investime të gjelbra

Prishtinë, 3 shtator 2026 12:10

Ministrja e Mjedisit dhe Planifikimit Hapësinor, Fitore Pacolli Dalipi, ka përfaqësuar Kosovën në Samitin Global të Investimeve 2026, të mbajtur në Paris, ku ka prezantuar potencialet e vendit para investitorëve dhe përfaqësuesve ndërkombëtarë.

Pacolli ka bërë të ditur se në cilësinë e folëses speciale ka promovuar mundësitë që Kosova ofron për investime të gjelbra, zhvillim të qëndrueshëm dhe krijimin e partneriteteve të reja ndërkombëtare.

“Pata nderin të prezantoj Kosovën para investitorëve dhe përfaqësuesve ndërkombëtarë, duke promovuar potencialin tonë për investime të gjelbra, zhvillim të qëndrueshëm dhe partneritete të reja”, ka shkruar Pacolli.

Sipas saj, pjesëmarrja në këtë samit përbën një mundësi për ta afruar Kosovën me kapitalin dhe investimet ndërkombëtare, si dhe për të krijuar mundësi të reja bashkëpunimi.

Samiti Global i Investimeve në Paris ka mbledhur investitorë ndërkombëtarë, drejtues institucionesh dhe përfaqësues të sektorit privat, me fokus në mundësitë e investimeve dhe projekteve të së ardhmes.