Oda Amerikane vlerëson vendimin për lirim të produkteve amerikane nga tarifat

Prishtinë, 1 gusht 2025

Oda Ekonomike Amerikane në Kosovë ka përshëndetur vendimin e Qeverisë së Kosovës për heqjen e tarifave doganore për të gjitha mallrat e importuara nga Shtetet e Bashkuara të Amerikës.

Në një njoftim për media, Oda e cilëson këtë hap si një veprim strategjik që përforcon partneritetin ekonomik me SHBA-në, aleatin më të ngushtë politik dhe ekonomik të Kosovës. Ky vendim, sipas saj, është përgjigje ndaj një kërkese të mëhershme të vetë Odës për një regjim tregtar preferencial, në funksion të thellimit të marrëdhënieve dypalëshe dhe krijimit të kushteve për një marrëveshje të ardhshme të tregtisë së lirë me SHBA-në.

“Heqja e tarifave rrit atraktivitetin e Kosovës si vend mikpritës për bizneset amerikane, lehtëson qasjen në produkte cilësore me çmime konkurruese dhe nxit investime në sektorë kyç,” thuhet në deklaratë.

Oda ka përgëzuar Qeverinë për këtë vendim dhe ka shprehur gatishmërinë për të promovuar më tej shkëmbimin tregtar dhe bashkëpunimin ekonomik ndërmjet dy vendeve.