Nga jeta në zhdukje – rrëfimi për 23 civilët e vrarë dhe groposur fshehtas

Prishtinë, 2 gusht 2026 15:25

Mjekë, profesorë, inxhinierë, mësues, studentë, nxënës, punëtorë, baballarë e bij ishin mes 23 civilëve shqiptarë të vrarë më 19 prill 1999, trupat e të cilëve dyshohet se u varrosën fshehtas në Kalludër të Vogël, në veri të Kosovës.

Sipas dëshmisë së serbit Ranko Tepavac, të dhënë para hetuesve të UNMIK-ut dhe Policisë së Kosovës në vitin 2003, policia serbe ishte njoftuar menjëherë pas krimit, por në vend të hetimit dhe arrestimit të autorëve, urdhëroi fshehjen e trupave.

Themeluesja e Fondit për të Drejtën Humanitare në Beograd, Natasha Kandiq, ka rikujtuar se informacionet për këtë krim kanë qenë të njohura prej vitesh, ndërsa ka theksuar se “në vend të hetimit dhe arrestimit të kryerësve, filloi fshehja e krimit”.

Pas zbulimit të varrit masiv në Kalludër të Vogël, mediat serbe raportuan për arrestimin në Kralevë të një personi me inicialet R.T., që përkojnë me ato të Ranko Tepavac. Kandiq kërkoi publikisht informacione për fatin e tij.

Në një tekst autorial, Kandiq publikoi emrat dhe të dhënat e 23 personave të zhdukur, mes tyre mjekë, profesorë, mësues, aktivistë, studentë e nxënës nga Mitrovica, Skënderaj dhe rrethina.

Ajo theksoi se pas secilit emër fshihet një histori familjare dhe një jetë e ndërprerë dhunshëm, duke kujtuar se “njerëzit mbajnë mend njerëzit”.