Kabineti i Kurtit: Komunat nuk mund ta ndryshojnë vendimin e Malit të Zi për njohjen e Kosovës

Prishtinë, 23 korrik 2026 08:43

Kabineti i kryeministrit të Kosovës, Albin Kurti, ka reaguar pas miratimit të një deklarate nga Kuvendi Komunal i Plevlës, përmes së cilës kundërshtohet njohja e pavarësisë së Kosovës nga Mali i Zi.

Në një përgjigje për Televizionin E, Kabineti i Kurtit thekson se njohja e Kosovës nga Mali i Zi është vendim i marrë në vitin 2008 nga institucionet kushtetuese të këtij shteti dhe se ai mbetet plotësisht në fuqi.

Sipas reagimit, vendimet apo deklaratat e komunave nuk kanë kompetencë të ndryshojnë politikën e jashtme të shtetit dhe nuk ndikojnë në marrëdhëniet e mira ndërmjet Kosovës dhe Malit të Zi.

Kabineti i Kryeministrit Kurti thekson se Kosova mbetet e përkushtuar për forcimin e marrëdhënieve fqinjësore me Malin e Zi, ndërsa iniciativa të tilla komunale cilësohen politikisht të padobishme, pasi përpiqen të paraqesin në mënyrë të gabuar politikën zyrtare të Qeverisë së Malit të Zi.

Në reagim theksohet gjithashtu se marrëdhëniet ndërmjet dy shteteve bazohen në njohjen reciproke, respektimin e sovranitetit dhe integritetit territorial, si dhe në përkushtimin e përbashkët për paqe, stabilitet dhe integrim euroatlantik.

Kabineti rikujton edhe opinionin këshillëdhënës të Gjykatës Ndërkombëtare të Drejtësisë, sipas të cilit shpallja e pavarësisë së Kosovës nuk ka shkelur të drejtën ndërkombëtare.

Në fund, Kabineti i Kurtit shpreh bindjen se iniciativa të tilla mund të pasqyrojnë ndikimin politik të Beogradit, i cili, sipas reagimit, historikisht ka synuar të sfidojë jo vetëm pavarësinë e Kosovës, por edhe orientimin sovran dhe të pavarur të Malit të Zi.