FSK ndërhyn në Sverkë të Pejës pas shpërthimit të zjarrit në deponinë e mbeturinave

Prishtinë, 22 korrik 2026 18:08

Forca e Sigurisë së Kosovës ka ndërhyrë në fshatin Sverkë të Komunës së Pejës, pas shpërthimit të një zjarri me përmasa të mëdha në deponinë e mbeturinave të kësaj zone.

Sipas njoftimit të FSK-së, pas kërkesës së pranuar nga Qendra e Situatave e Sekretariatit të Këshillit të Sigurisë së Kosovës, Qendra Operative e FSK-së ka bërë vlerësimin e menjëhershëm të situatës dhe kapaciteteve për reagim.

Me urdhër të komandantit të FSK-së, gjenerallejtënant Bashkim Jashari, në terren janë angazhuar njësitë e specializuara të Gardës Kombëtare, të cilat kanë nisur operacionin për përballimin e kësaj situate emergjente.

Qëllimi i ndërhyrjes është izolimi i vatrës së zjarrit, zvogëlimi i rrezikut nga ndotja toksike e mjedisit dhe parandalimi i pasojave të mundshme për shëndetin e qytetarëve.

FSK ka bërë të ditur se njësitë e saj po bashkëpunojnë me autoritetet qendrore e lokale, shërbimet emergjente dhe banorët e zonës, me synim rikthimin e gjendjes normale sa më shpejt.

“Forca e Sigurisë së Kosovës mbetet e përkushtuar që t’u shërbejë të gjithë qytetarëve të Kosovës, në përputhje me detyrat dhe misionin e saj”, thuhet në njoftim.