Marash Dukaj: Plevla duhet të merret me problemet e qytetarëve, jo me ideologji politike

Prishtinë, 22 korrik 2026 08:10

Ministri i Administratës Publike i Malit të Zi, Marash Dukaj, ka reaguar ndaj deklaratës së miratuar nga Kuvendi Komunal i Plevlës për mosnjohjen e vendimit të Malit të Zi për njohjen e pavarësisë së Kosovës, duke vlerësuar se një veprim i tillë nuk i shërben të ardhmes evropiane të shtetit.

Përmes një reagimi në rrjetin social X, Dukaj tha se këshilltarët komunalë kanë marrë përsipër kompetenca kushtetuese dhe juridike që nuk u takojnë, duke theksuar se, ndonëse respekton lirinë e shprehjes, ajo nuk duhet të cenojë marrëdhëniet e mira fqinjësore.

“Nuk është mirë që këshilltarët komunalë të Plevlës i kanë përvetësuar elemente kushtetuese dhe juridike që nuk u takojnë, ndonëse nuk më pengon që demokracia e mendimit të lirë të shtrihet në të gjitha sferat e shoqërisë, por pa cenuar marrëdhëniet e mira fqinjësore, të cilat janë qëllimi parësor i vendit tonë”, ka shkruar Dukaj.

Ai shtoi se prioritet i autoriteteve lokale duhet të jenë problemet dhe nevojat e qytetarëve, e jo temat që, sipas tij, ushqejnë ndarje politike.

“Plevla dhe politikanët atje ua kanë borxh qytetarëve të tyre kushte më të mira për një mjedis të shëndetshëm jetese, zhvillim të qëndrueshëm, e jo vendosjen në plan të parë të ideologjive politike partikulariste dhe rajonale, të cilat nuk janë në interes të Malit të Zi të sotëm”, theksoi ministri.

Reagimi i Dukajt erdhi pasi Kuvendi Komunal i Plevlës miratoi të martën një deklaratë pa fuqi juridike për mosnjohjen e vendimit të Malit të Zi për njohjen e pavarësisë së Kosovës.