Marrëveshje e re për sigurinë e informacionit të klasifikuar mes Ministrisë së Mbrojtjes dhe AMIK-ut

Prishtinë, 21 korrik 2026 16:40

Ministria e Mbrojtjes dhe Agjencia për Mbrojtjen e Informacionit të Klasifikuar (AMIK) kanë nënshkruar të martën një marrëveshje bashkëpunimi që synon forcimin e koordinimit institucional në mbrojtjen e informacionit të klasifikuar dhe ngritjen e kapaciteteve në fushën e sigurisë kombëtare.

Marrëveshja u nënshkrua nga ministri në detyrë i Mbrojtjes, Ejup Maqedonci, dhe drejtori i AMIK-ut, Emin Hoxhaj.

Sipas ministrit Maqedonci, marrëveshja krijon një kornizë të qëndrueshme bashkëpunimi ndërmjet dy institucioneve, duke paraparë koordinim më të ngushtë, shkëmbim të praktikave profesionale, organizim të trajnimeve të përbashkëta, si dhe mbështetje teknike e profesionale në fushën e sigurisë së informacionit të klasifikuar.

Po ashtu, bashkëpunimi do të përfshijë trajtimin e çështjeve që lidhen me mbrojtjen e informacionit të klasifikuar, me synim rritjen e efikasitetit institucional dhe përballimin e sfidave në fushën e sigurisë.

Ministri në detyrë, Ejup Maqedonci, tha se mbrojtja e informacionit të klasifikuar përbën një element kyç të sigurisë kombëtare, duke theksuar se partneriteti ndërinstitucional do të kontribuojë në forcimin e mekanizmave që garantojnë mbrojtjen e interesave shtetërore dhe në rritjen e gatishmërisë së institucioneve për t’iu përgjigjur sfidave të sigurisë.