MAPL nuk lejon realizimin e muralit të ish-Patriarkut serb, Pavle, në hapësirën publike në Mitrovicë të Veriut

Prishtinë, 20 korrik 2026 19:20

Ministria e Administrimit të Pushtetit Lokal ka refuzuar kërkesën e Komunës së Mitrovicës së Veriut, për realizimin e muralit të ish-Patriarkut serb Pavle, me arsyetimin se murali nuk i plotëson standardat kushtetuese dhe ligjore për përdorim të hapësirës publike.

Sipas vendimit, projekti nuk mund të shihet ekskluzivisht si një aktivitet privat artistik ose kulturor, pasi parashikon instalimin e simboleve fetare në hapësirën publike komunale.

Ministria deklaron se komuna ka detyrimin të respektojë parimet kushtetuese dhe të konventave që lidhen me neutralitetin e autoriteteve publike sipas besimeve fetare, barazinë, ndalimin e diskriminimit dhe mbrojtjen e të drejtave të të gjitha komuniteteve.

Në shpjegim, vlerësohet se leja e lëshuar nga Komuna e Mitrovicës së Veriut, në formën e saj aktuale, nuk ofron garanci të mjaftueshme se efektet e projektit mbi banorët e feve të ndryshme janë marrë në konsideratë, se janë zbatuar kritere neutrale për përdorimin e hapësirës publike, se është kryer një konsultim gjithëpërfshirës publik, as se është shpjeguar proporcionaliteti i vendimit.

Për këto arsye, Ministria e Administrimit të Pushtetit Lokal kërkoi pezullimin e zbatimit të projektit dhe marrjen e masave të nevojshme për të shqyrtuar ligjshmërinë e tij, duke theksuar se çdo vendim për përdorimin e hapësirave publike duhet të jetë në përputhje me Kushtetutën e Republikës së Kosovës, Konventën Evropiane për të Drejtat e Njeriut dhe standardet për mbrojtjen e të drejtave të të gjitha komuniteteve.