Rishikohen lejet mjedisore, Pacolli: Pjesëmarrja e qytetarëve nuk do të jetë formalitet

Prishtinë, 15 korrik 2026 18:28

Ministrja e Mjedisit dhe Planifikimit Hapësinor, Fitore Pacolli, ka bërë të ditur se janë rikthyer në procedurë të gjitha rastet për pajisje me Pëlqim Mjedisor, në të cilat procesi i konsultimit publik nuk ka përmbushur standardet ligjore.

Sipas njoftimit të ministres Pacolli, vendimi synon të forcojë transparencën dhe përfshirjen e qytetarëve në proceset vendimmarrëse që lidhen me mbrojtjen e mjedisit.

Ajo ka theksuar se qytetarët duhet të kenë rol aktiv në këto procese, duke vlerësuar se vendimmarrja e drejtë për mjedisin nuk mund të bëhet pa zërin dhe pjesëmarrjen e komuniteteve.

Me vendimin e ri, do të rishqyrtohen lëndët ku Raporti i Vlerësimit të Ndikimit në Mjedis (VNM) nuk ka qenë i qasshëm për publikun ose ku nuk janë respektuar procedurat ligjore të konsultimit publik.

Ajo ka bërë të qartë se asnjë Pëlqim Mjedisor nuk do të jepet pa u zhvilluar një proces konsultimi publik i rregullt, transparent dhe gjithëpërfshirës.

Pas përsëritjes së procedurave dhe sigurimit të qasjes në dokumentacionin e VNM-së, operatorët ekonomikë dhe hartuesit e raporteve do të obligohen të zhvillojnë forma shtesë të konsultimit me komunitetin, përmes takimeve fizike apo komunikimit elektronik, duke dokumentuar të gjithë procesin.

Sipas Pacollit, ky vendim synon që pjesëmarrja e qytetarëve të mos mbetet vetëm një kërkesë formale, por të shndërrohet në një element thelbësor të politikave mjedisore.

“Qytetarët janë aleatët tanë më të rëndësishëm në mbrojtjen e mjedisit”, ka deklaruar ministrja, duke theksuar se komunitetet do të jenë partnerë në hartimin dhe zbatimin e politikave për një mjedis më të mbrojtur.