Modernizohet flota hekurudhore e Kosovës, Trainkos investon në sigurinë e udhëtarëve

Prishtinë, 15 korrik 2026 15:49

Autoriteti Rregullativ i Hekurudhave ka licencuar pesë vagona të Hekurudhave të Kosovës – Trainkos Sh.A., pasi ata kanë përfunduar me sukses procesin e riparimit të mesëm, duke shënuar një hap të ri drejt modernizimit të flotës hekurudhore në vend.

Sipas Trainkos, licencimi i këtyre vagonëve pritet të ndikojë në rritjen e sigurisë, besueshmërisë dhe cilësisë së shërbimeve për udhëtarët, si pjesë e përkushtimit të vazhdueshëm për mirëmbajtjen dhe avancimin e sistemit hekurudhor, përcjell VeritasInfo.

Kompania thekson se investimet në flotën hekurudhore po synojnë t’i bëjnë udhëtimet më të shpejta, më komode dhe më cilësore për qytetarët. Po ashtu, ajo u bën thirrje udhëtarëve që të kontribuojnë në ruajtjen e vagonëve, duke i konsideruar ata pasuri të përbashkët.

“Nëpërmjet kujdesit për pastërtinë dhe mirëmbajtjen e tyre, ne jo vetëm që përmirësojmë përvojën e udhëtimit, por edhe pasqyrojmë kulturën qytetare dhe imazhin e vendit”, thuhet në njoftimin e Trainkos.

Kompania ka apeluar gjithashtu që çdo rast i dëmtimit të qëllimshëm apo vandalizmit të raportohet te stafi i trenit ose tek autoritetet përgjegjëse, me qëllim ruajtjen e aseteve publike dhe garantimin e një shërbimi sa më cilësor për të gjithë udhëtarët.