Kosova përballet me Shqipërinë në një ndeshje të rëndësishme për EuroBasket 2029

Prishtinë, 23 qershor 2026 12:26

Përfaqësuesja e Kosovës në basketboll do të zhvillojë më 2 korrik një nga ndeshjet më të rëndësishme në kuadër të parakualifikimeve për FIBA EuroBasket 2029, duke u përballur me Shqipërinë.

Takimi, që konsiderohet me peshë të madhe për synimet e Kosovës në këtë cikël garues, do të luhet në palestrën sportive “Sezai Surroi” në Prizren, me fillim nga ora 19:00.

Kjo do të jetë ndeshja e tretë parakualifikuese e Kosovës në rrugëtimin drejt Kampionatit Evropian të basketbollit, ndërsa përballja me Shqipërinë pritet të zgjojë interesim të madh te tifozët e të dyja vendeve.

Federata e Basketbollit e Kosovës ka bërë thirrje për mbështetje sa më të madhe nga publiku, duke synuar një atmosferë të zjarrtë në Prizren për këtë duel rajonal me rëndësi të veçantë.