Pesë kandidatë kalojnë fazën e parë për Kryeprokuror të Shtetit

Prishtinë, 17 qershor 2026 14:09

Këshilli Prokurorial i Kosovës ka konfirmuar se pesë kandidatët që kanë aplikuar për pozitën e Kryeprokurorit të Shtetit i kanë plotësuar kushtet ligjore për të vazhduar në fazat e mëtejme të procesit të përzgjedhjes.

Vendimi është marrë nga Paneli Vlerësues për emërimin e Kryeprokurorit të Shtetit, i kryesuar nga kryesuesi i KPK-së, Arian Gashi, së bashku me anëtarët Elza Bajrami-Kastrati dhe Visar Krasniqi, gjatë një takimi të mbajtur të mërkurën, shkruan VeritasInfo.

Sipas njoftimit të KPK-së, paneli ka shqyrtuar dokumentacionin e paraqitur nga kandidatët me qëllim të verifikimit të përmbushjes së kushteve dhe kritereve të përcaktuara me legjislacionin në fuqi.

Pas vlerësimit të dokumentacionit, është konstatuar se të gjithë aplikuesit i kanë përmbushur kriteret për të vazhduar garën për postin e Kryeprokurorit të Shtetit.

Kandidatët që kaluan këtë fazë janë Atdhe Dema, prokuror në Prokurorinë Speciale të Kosovës, Naim Abazi, prokuror në Prokurorinë Speciale të Kosovës, Rafet Halimi, prokuror në Prokurorinë Speciale të Kosovës, Shqipdon Fazliu, prokuror në Zyrën e Kryeprokurorit të Shtetit, si dhe Zejnullah Gashi, kryeprokuror i Prokurorisë Themelore në Prishtinë.

KPK ka bërë të ditur se procesi i vlerësimit është zhvilluar në mënyrë transparente dhe në përputhje me standardet ligjore në fuqi.

Paneli Vlerësues pritet të vazhdojë me procedurat e tjera të procesit të përzgjedhjes, sipas afateve dhe kritereve të përcaktuara me ligj për zgjedhjen e Kryeprokurorit të Shtetit.