Dokumentari serb zbulon policin e dyshuar për Masakrën e Reçakut

Prishtinë, 17 qershor 2026 08:27

Një dokumentar i realizuar nga Radiotelevizioni i Serbisë, i cili kishte për synim të sfidonte versionin e njohur ndërkombëtarisht për Masakrën e Reçakut, ka rikthyer në qendër të vëmendjes identitetin e personave që morën pjesë në operacionin e 15 janarit 1999.

Filmi dokumentar “Dosja e Kosovës – Reçaku”, i prodhuar në bashkëpunim me institucionet shtetërore serbe, tenton t’i paraqesë pjesëtarët e forcave serbe si protagonistë të një operacioni policor, që u shndërrua në një akt terrorizmi, e që më vonë do të njihet si një nga masakrat më të rënda të luftës në Kosovë – Masakra e Reçakut.

Megjithatë, paraqitja publike e pjesëmarrësve në operacion ka prodhuar efektin e kundërt. Në vend që t’i shndërrojë në heronj, dokumentari ka ndihmuar në identifikimin e personave që kanë qenë të përfshirë në ngjarjet e përgjakshme të Reçakut.

Njëri prej të arrestuarve të fundit për krime lufte në Reçak, është personi që në ditën e krimit është xhiruar duke shkelmuar derën e një shtëpie, pretendon Prokuroria Speciale.

Masakra e Reçakut, ku u vranë 45 civilë shqiptarë, konsiderohet një nga krimet më të rënda të luftës në Kosovë. Ngjarja u dënua nga bashkësia ndërkombëtare dhe u cilësua si krim kundër njerëzimit nga William Walker, shefi i atëhershëm i Misionit Verifikues të OSBE-së në Kosovë.

Përpjekjet e Serbisë për ta paraqitur Reçakun si një operacion të zakonshëm policor apo ushtarak bien ndesh me faktet e dokumentuara ndër vite nga organizatat ndërkombëtare, raportet e misioneve monitoruese dhe dëshmitë e të mbijetuarve.

Më shumë se 27 vjet pas masakrës, familjarët e viktimave vazhdojnë të kërkojnë drejtësi, ndërsa çdo përpjekje për të ndryshuar narrativën e ngjarjeve të janarit 1999 vazhdon të kundërshtohet nga studiues, institucione dhe organizata që e konsiderojnë Masakrën e Reçakut një fakt të dëshmuar historikisht.

Pesë persona janë arrestuar gjatë një operacioni të zhvilluar nga Policia e Kosovës në bashkëpunim me Prokurorinë Speciale të Republikës së Kosovës, në kuadër të hetimeve për rastin e njohur si “Reçaku II”.