Bullgaria në krah të Kosovës për integrimin në BE dhe anëtarësimin në KiE

Prishtinë, 10 qershor 2026 21:05

Bullgaria ka konfirmuar mbështetjen e saj të vazhdueshme për integrimin evropian të Kosovës, duke theksuar se Prishtina mund të llogarisë në Sofjen si në rrugën drejt anëtarësimit në Bashkimin Evropian, ashtu edhe për anëtarësimin në Këshillin e Evropës.

Për këtë mund të flitet më shumë në një takim të shefave të dy qeverive, që sipas krye diplomates bullgare, Velislava Petrova mund të mbahet pasi të jetë konstituuar ekzekutivi në Prishtinë.

Kjo u bë e ditur gjatë një takimi dypalësh ndërmjet ministres së Punëve të Jashtme të Bullgarisë, Petrova, dhe zëvendëskryeministrit të parë dhe ministrit të Punëve të Jashtme dhe Diasporës të Kosovës, Glauk Konjufca.

Takimi u zhvillua në kuadër të mbledhjes së ministrave të Jashtëm të Procesit të Bashkëpunimit të Evropës Juglindore (SEECP), që po mbahet në Sofje.

Ministrja Petrova, sipas një njoftimi të zyrës së saj, rikonfirmoi mbështetjen konsistente të Bullgarisë për perspektivën evropiane të Kosovës, duke nënvizuar se kjo e fundit mund të mbështetet te Sofja si për avancimin e procesit të integrimit në BE, ashtu edhe për anëtarësimin në Këshillin e Evropës.

Dy kryediplomatët, gjithnjë sipas kumtesës, vlerësuan gjithashtu dialogun e shkëlqyer politik ndërmjet Bullgarisë dhe Kosovës dhe shprehën gatishmërinë për thellimin e mëtejmë të bashkëpunimit dypalësh në fusha me interes të përbashkët.

Në këtë kuadër, Petrova theksoi se një vizitë në nivel të kryeministrave, pas formimit të qeverisë së re të rregullt në Kosovë, do t’i jepte një shtysë të re marrëdhënieve dhe bashkëpunimit ndërmjet dy vendeve