Autobusë nga Serbia sjellin votues në veri, një dëshmi e ndërhyrjes flagrante të Serbisë në zgjedhje dhe zbehjes së fuqisë politike të Listës Serbe

Mitrovicë e Veriut, 7 qershor 2026 16:20

Në ditën e zgjedhjeve, dhjetëra votues të zhvendosur janë transportuar me autobusë nga qytete të ndryshme të Serbisë drejt komunave në veri të Kosovës, në një organizim që ka ngritur sërish shqetësime për përfshirjen e drejtpërdrejtë të strukturave serbe në procesin zgjedhor.

Mes tyre ishte edhe Miodrag Deniq nga Kragujevci, me origjinë nga Zveçani, i cili për VeritasInfo deklaroi se kishte ardhur posaçërisht për të votuar.

“Unë ndonjëherë vij privatisht, por tani kam ardhur posaçërisht për të votuar, për të mbështetur njerëzit e mi dhe për të shfrytëzuar rastin për të vizituar të afërmit e mi”, tha ai.

Më domethënës është fakti se, sipas vetë Deniqit, shpenzimet e organizimit dhe transportit janë mbuluar nga një institucion i Qeverisë së Serbisë. Kjo dëshmi forcon perceptimin për një mobilizim të koordinuar institucional nga Beogradi për të ndikuar në pjesëmarrjen zgjedhore në komunat me shumicë serbe.

Gjatë ditës, autobusë me votues të ardhur nga qytete të ndryshme të Serbisë janë parë në disa lokacione në veri të Kosovës, duke dëshmuar për një operacion të organizuar transporti që shkon përtej angazhimit individual të votuesve.

Këto zhvillime kanë rihapur debatin mbi ndikimin e vazhdueshëm të institucioneve serbe dhe strukturave të afërta me Listën Serbe në proceset politike në Kosovë. Kritikët vlerësojnë se organizimi i transportit dhe mobilizimi kolektiv i votuesve nga Serbia përbëjnë një formë ndërhyrjeje politike që synon ruajtjen e ndikimit të Beogradit në skenën politike në veri, ndërsa mbështetësit e këtij organizimi e konsiderojnë atë si ndihmë për qytetarët që gëzojnë të drejtën e votës.

Prania e organizuar e votuesve nga Serbia ka nxitur reagime dhe pyetje lidhur me barazinë e kushteve zgjedhore, transparencën e procesit dhe shkallën e ndikimit që strukturat politike serbe vazhdojnë të ushtrojnë në komunitetin serb të Kosovës.