Shërbimi mamografik për herë të parë në Fushë Kosovë, investim prej 80 mijë eurosh

Fushë Kosovë, 6 qershor 2026 09:20

Qytetarët e Fushë Kosovës do të kenë për herë të parë qasje në shërbimin e mamografisë brenda komunës së tyre, një hap i rëndësishëm drejt forcimit të kujdesit shëndetësor dhe zbulimit të hershëm të kancerit të gjirit. Kjo është bërë e ditur nga kryetari i Komunës së Fushë Kosovës, Valon Prebreza, i cili njoftoi se shërbimi do të nisë nga 1 gushti në Qendrën e Mjekësisë Familjare 2.

Sipas Prebrezës, mamografia do të ofrohet në kuadër të programit të skriningut për kancerin e gjirit, duke u mundësuar grave dhe qytetarëve të komunës kontrolle më të afërta dhe më të lehta pa pasur nevojë të udhëtojnë në komuna të tjera për këtë shërbim.

Ai bëri të ditur se investimi për pajisjen me mamograf arrin vlerën e 80 mijë eurove dhe është pjesë e një projekti kombëtar që parasheh vendosjen e 16 mamografëve në gjithë territorin e Kosovës. Sipas tij, Fushë Kosova është komuna e parë që do ta ofrojë këtë shërbim në kuadër të këtij projekti.

Vendosja e mamografit konsiderohet një zhvillim i rëndësishëm për sektorin e shëndetësisë në komunë, pasi diagnostikimi i hershëm i kancerit të gjirit rrit ndjeshëm mundësitë për trajtim të suksesshëm dhe shpëtimin e jetëve.

Ky investim pritet të përmirësojë qasjen e qytetarëve në shërbimet diagnostikuese dhe të forcojë programet parandaluese në kujdesin shëndetësor primar në Fushë Kosovë.