Anëtarësimi i Kosovës në NATO do të forconte sigurinë rajonale

Prishtinë, 3 qershor 2026 07:30

Ministri në detyrë i Digjitalizimit dhe Administratës Publike, Lulëzon Jagxhiu, ka theksuar në Paris Cyber Summit se anëtarësimi sa më i shpejtë i Kosovës në NATO do të kontribuonte në forcimin e sigurisë dhe stabilitetit në rajon.

Gjatë një sesioni strategjik të mbyllur të udhëhequr nga James Appathurai, ministri Jagxhiu theksoi gjithashtu rëndësinë e përfshirjes së Kosovës në mekanizmat e Bashkimi Evropian dhe NATO-s në fushën e sigurisë kibernetike edhe para anëtarësimit të plotë.

Sipas njoftimit, sesioni mblodhi një numër të kufizuar vendimmarrësish, politikëbërësish dhe ekspertësh të sigurisë kibernetike nga Evropa dhe SHBA-ja për të diskutuar sfidat aktuale dhe të ardhshme në këtë fushë.

Diskutimet u përqendruan në rritjen e rëndësisë së reziliencës kibernetike për sigurinë kombëtare dhe mbrojtjen kolektive, si dhe në kërcënimet hibride, mbrojtjen e infrastrukturës kritike, ndikimin e inteligjencës artificiale në siguri dhe nevojën për bashkëpunim më të ngushtë ndërmjet institucioneve shtetërore, aleatëve dhe sektorit privat.

Ministri Jagxhiu theksoi se forcimi i kapaciteteve të sigurisë kibernetike dhe thellimi i bashkëpunimit me partnerët euroatlantikë mbeten prioritete strategjike për Kosovën, me qëllim mbrojtjen e institucioneve, infrastrukturës kritike dhe qytetarëve përballë sfidave në rritje të sigurisë digjitale.