Kushtetuesja ndalon vendimet e deputetëve pas afatit ligjor 30-ditor

Prishtinë, 24 korrik 2025

Kushtetuesja pezullon veprimet e Kuvendit pas afatit 30-ditor.

Gjykata Kushtetuese ka vendosur një masë të përkohshme ndaj seancave të Kuvendit të Kosovës, e cila hyn në fuqi nga 27 korriku dhe do të zgjasë deri më 8 gusht 2025.

Sipas vendimit, deputetëve u ndalohet çdo vendim apo veprim pas përfundimit të afatit 30-ditor të përcaktuar në aktgjykimin e parë të Gjykatës, i cili kishte ardhur pas kërkesës së AAK-së.

Gjykata thekson se vendimmarrja pas këtij afati mund të shkaktojë “dëme të pariparueshme për rendin kushtetues dhe funksionimin e institucioneve kyçe të Republikës së Kosovës”. Ajo e cilëson këtë ndalesë si të domosdoshme për ruajtjen e rendit kushtetues dhe interesit publik, veçanërisht në procesin e themelimit të institucioneve shtetërore pas zgjedhjeve.

Në aktvendim thuhet qartë:

“Ndalimi i çdo vendimi dhe veprimi nga ana e deputetëve të zgjedhur të Kuvendit pas 26 korrikut 2025 është në interes publik dhe i domosdoshëm për mbrojtjen e rendit kushtetues dhe interesin e qytetarëve të Republikës së Kosovës.”

Ky vendim lidhet me rastin e iniciuar nga deputetët e LDK-së dhe PDK-së, të cilët kontestojnë votimin e Komisionit për votim të fshehtë në vazhdimin e seancës konstituive të Legjislaturës IX, më 29 qershor 2025.

Megjithatë, Gjykata e ka vendosur këtë masë ex officio – pra me nismë të saj, pa qenë e kërkuar nga parashtruesit.