KFOR-i vendos shenja të reja paralajmëruese përgjatë vijës kufitare ndërmjet Kosovës dhe Serbisë

Misioni paqeruajtës i KFOR-it ka njoftuar se ka vendosur shenja të reja dhe ka rinovuar ato ekzistuese përgjatë vijës kufitare administrative ndërmjet Kosovës dhe Serbisë, me qëllim të zvogëlimit të rrezikut nga kalimet e paqëllimshme të kufirit.

“Nëpërmjet këtyre shenjave synohet që qytetarët të paralajmërohen se po i afrohen vijës kufitare (ABL). Ky aktivitet pasqyron përkushtimin e paanshëm të KFOR-it për të garantuar një mjedis të sigurt për të gjitha komunitetet që jetojnë në Kosovë”, thuhet në njoftimin e KFOR-it.

Nga misioni theksojnë se është përmirësuar edhe dukshmëria e shenjave ekzistuese, në mënyrë që qytetarëve t’u lehtësohet orientimi pranë zonave kufitare. Në rrjetet sociale, KFOR-i ka publikuar edhe pamje që tregojnë procesin e vendosjes së shenjave të reja.

Këto masa ndërmerren në një kohë me tensione të ngritura politike dhe të sigurisë në rajon, me synim parandalimin e incidenteve dhe ruajtjen e stabilitetit në terren.