Përkujtohe Masakra e Studimes, kërkohet drejtësi për krimet e luftës

Prishtinë 2 Maj 2026 14:14

Liderët institucionalë dhe politikë përkujtuan sot në një akademi përkujtimore viktimat e Masakrës së Studimës, një prej ngjarjeve më të rënda të luftës në Kosovë,

Ushtruesja e detyrës së presidentes Albulena Haxhiu kujtoi 116 civilët shqiptarë të vrarë në këtë masakër, duke theksuar se krimet mbeten ende pa u ndëshkuar.

“116 civilë shqiptarë, fëmijë, gra, burra e pleq të paarmatosur, të cilët po largoheshin nga fshatrat e rrethuara për të mbetur gjallë. Masakra nuk ishte fundi i operacionit gjenocidial. Serbia nuk u mjaftua me vrasjen, donte ta linte krimin pa gjykim, edhe sot i strehon kriminelët e luftës”, tha Haxhiu.

Ajo shtoi se institucionet do të vazhdojnë mbledhjen e dëshmive për të gjitha masakrat e kryera gjatë luftës.

“Flasim për të gjitha masakrat ku Serbia la njerëz të vrarë. Keni jetuar me kujtime e pritje, por keni qëndruar, keni ruajtur të vërtetën, keni folur kur është dashur të dëshmohet për krimet që Serbia i ka bërë vendit tonë. Shteti do të jetë me ju në mbledhjen e dëshmive në të gjitha institucionet, edhe ato ndërkombëtare të drejtësisë. Serbia donte një Kosovë pa shqiptarë. Projekti i Serbisë dështoi nga sakrifica e martirëve, përkrahja ndërkombëtare dhe lufta e lavdishme e UÇK-së”, deklaroi Haxhiu.

Kryetari i AAK-së, Ramush Haradinaj, tha se ruajtja e kujtesës dhe forcimi i shtetit janë detyrime të vazhdueshme.

“E ndiejmë përgjegjësinë t’i qëndrojmë afër kësaj porosie. U vranë 116 civilë, është detyrë e të gjallëve me ruajt kujtesën. Në të gjallët kemi edhe detyra të tjera. Mos të lejojmë që në të ardhmen Kosovës t’i ndodhin të këqijat që Serbia i ka bërë popullit të Kosovës. Ta forcojmë ushtrinë, policinë e të gjitha institucionet, por edhe duke ruajtur miqësinë me Amerikën, sepse duke ruajtur aleancën me Amerikën, Serbisë ia bëjmë të pamundur të na rrezikojë”, tha Haradinaj.

Kryetari i Komunës së Vushtrrisë, Ferit Idrizi, tha se Studimja mbetet simbol i sakrificës dhe vuajtjes së civilëve shqiptarë.

“Në këtë vend, në këtë lum që do të jetë si emërtim ‘Lumi i gjakut’, që u la me gjakun e civilëve të pafajshëm, të cilët u masakruan vetëm pse ishin shqiptarë. Këtu dhe në të gjitha pjesët e Kosovës, ky gjak u bë liri dhe pavarësi. Ende nuk është gjetur drejtësi, e ish-krerët e UÇK-së po mbahen padrejtësisht në Hagë”, tha Idrizi.