FSK forcon praninë ndërkombëtare, ekip paraprak në Gaza për vlerësim

Prishtinë, 26 prill 2026

Forca e Sigurisë së Kosovës (FSK) ka ndërmarrë hapa konkretë drejt përfshirjes në një mision ndërkombëtar paqeruajtës në Gaza, duke dërguar një ekip paraprak për vlerësimin e situatës në terren.

Me urdhër të komandantit të FSK-së, Gjenerallejtënant Bashkim Jashari, ekipi ka udhëtuar drejt Gazës për të realizuar rikonicionin e zonës ku pritet të operojë kontingjenti kosovar. Qëllimi i kësaj vizite është vlerësimi fillestar i kushteve dhe koordinimi i aktiviteteve të nevojshme për dislokimin e trupave.

Sipas njoftimit, gjatë qëndrimit në terren, FSK ka zhvilluar takime me autoritete përgjegjëse për administrimin e Gazës, si dhe me përfaqësues të mekanizmave ndërkombëtarë të koordinimit. Në fokus të diskutimeve kanë qenë integrimi i kontingjentit të FSK-së në mision, zhvillimi i operacioneve të përbashkëta dhe organizimi i mbështetjes logjistike.

Po ashtu, janë zhvilluar takime me përfaqësues të Qendrës Koordinuese Civilo-Ushtarake (CMCC), e cila vepron nën mbikëqyrjen e Bordit të Paqes, në përputhje me Rezolutën 2803 të Organizatës së Kombeve të Bashkuara.

Përfshirja e FSK-së në këtë mision konsiderohet si një hap i rëndësishëm në rritjen e rolit ndërkombëtar të Kosovës në fushën e sigurisë dhe paqeruajtjes.

Nga FSK theksojnë se mbeten të përkushtuar për të kontribuar në paqe dhe stabilitet global, në bashkëpunim me aleatët ndërkombëtarë, veçanërisht me Shtetet e Bashkuara të Amerikës, duke synuar forcimin e partneriteteve strategjike dhe promovimin e sigurisë kolektive në përputhje me standardet ndërkombëtare.