Prokuroria kërkon paraburgim për Igor Popoviqin pas deklaratave për UÇK-në

Prishtinë 19 korrik 2025

Prokuroria Speciale e Kosovës ka kërkuar që Igor Popoviqi ndihmësdrejtori i të ashtuquajturës  Zyrë për Kosovën në Qeverinë e Serbisë ti caktohet masa e paraburgimit.

Ndaj tij, Prokuroria kishte nxjerrë aktvendim për ndalim prej 48-orë të premten për  veprën penale “Nxitje e përçarjes dhe mosdurimit”.

Lajmin për teve1.info e ka konfirmuar të shtunën zëdhënësja e kësaj prokurorie Arbnora Luta.

“Prokuroria Speciale e Republikës së Kosovës ka nxjerrë aktvendim për ndalim prej 48 orësh ndaj personit I.P., lidhur me dyshimet për kryerjen e veprës penale “Nxitja e përçarjes dhe mosdurimit”.   PSRK ka parashtruar kërkesë për caktimin e masës së paraburgimit në Gjykatën Themelore në Prishtinë, me qëllim të krijimit të mundësisë për të zhvilluar hetimet pa pengesa procedurale, pasi i dyshuari është shtetas i huaj”, ka thënë Luta.

Popoviq është arrestuar të premten pas në një deklaratë në një fshat në Rahovec e kishte quajtur Ushtrinë Çlirimtare të Kosovës, organizatë terroriste.

“Në PKK Bërnjak është arrestuar i dyshuari shtetas i Serbisë për shkak se i njëjti dyshohet se gjatë një fjalimi në fshatin Hoqë e Madhe ka cilësuar Ushtrinë Çlirimtare të Kosovës si organizatë terroriste duke i krahasuar veprimet e saj me ngjarje të rënda ndërkombëtare. Me këto veprime i njëjti dyshohet se ka kryer veprën penale të lartcekur. Nga i dyshuar në cilësi të provave materiale janë sekuestruar përkohësisht 2 telefona celularë. Me vendim të prokurorit i dyshuari pas intervistimit është dërguar në mbajtje”,ka njoftuar Policia e Kosovës

Për këtë rast ka reaguar edhe ministri në detyrë i Punëve të Brendshme.

Ai ka thënë se Kosova është shtet demokratik, por nuk do të lejojë të përdhoset lufta çlirimtare.

Deklaratën e tij e kanë dënuar edhe organizata e dala nga lufta e UÇK-së. Ndërsa, Serbia ka kërkuar lirimin e Popoviqit.