Nisin punimet për ndërtimin e rrethrrotullimit në dalje të Gjilanit drejt Prishtinës

Gjilan, 17 prill 2026 12:04

Në Gjilan kanë nisur punimet për ndërtimin e një rrethrrotullimi në një nga pikat më të frekuentuara të trafikut, në dalje të qytetit në drejtim të Prishtina.

Projekti po realizohet në kryqëzimin e rrugës transit, zonë kjo e njohur për vështirësi të vazhdueshme në qarkullim dhe kolona të gjata të automjeteve. Sipas autoriteteve komunale, ndërtimi i rrethrrotullimit synon të lehtësojë lëvizjen dhe të rrisë sigurinë për të gjithë pjesëmarrësit në trafik.

Kryetari i komunës, Alban Hyseni, i shoqëruar nga drejtori i Shërbimeve Publike, Kushtrim Ibrahimi, kanë parë nga afër fillimin e punimeve. Ata theksuan se projekti është pjesë e angazhimeve për përmirësimin e infrastrukturës rrugore në qytet.
Sipas Hysenit, pas përfundimit të procedurave administrative dhe nënshkrimit të kontratës, tashmë kanë nisur ndërhyrjet e para në terren. Ai shtoi se kjo ndërhyrje pritet t’i japë fund “ngushticës” në këtë segment rrugor, duke shmangur pritjet e gjata dhe duke lehtësuar qarkullimin.

Ndërkohë, drejtori Ibrahimi e cilësoi këtë pikë si një ndër më problematiket për qarkullimin e automjeteve, duke theksuar se me realizimin e projektit do të përmirësohet dukshëm rrjedha e trafikut.

Autoritetet komunale kanë bërë të ditur se rrethrrotullimi do të ndikojë drejtpërdrejt në rritjen e sigurisë dhe funksionalitetit të këtij segmenti rrugor, i cili lidh Gjilanin me kryeqytetin.