Nisin vizitat sistematike shëndetësore në shkollat e Suharekës

Suharekë 16 prill 2026. 12:39

Në të gjitha shkollat e komunës së Suharekës kanë nisur vizitat sistematike shëndetësore për nxënësit, një proces që synon monitorimin e gjendjes së tyre shëndetësore, identifikimin e hershëm të problemeve dhe rritjen e ndërgjegjësimit për edukimin shëndetësor.

Nisma është bërë e ditur nga kryetari i komunës, Bali Muharremaj, i cili ka theksuar rëndësinë e këtij aktiviteti për mirëqenien e nxënësve. Sipas tij, përmes këtyre kontrolleve synohet përmirësimi i kujdesit shëndetësor në shkolla dhe ndërhyrja në kohë në rast të problemeve të mundshme.
“Sot fillojmë me realizimin e vizitave sistematike shëndetësore në të gjitha shkollat e Komunës së Suharekës”, ka deklaruar Muharremaj, duke shtuar se procesi do të shërbejë edhe për promovimin e edukimit shëndetësor tek të rinjtë.

Ai ka bërë të ditur se këto vizita kanë për qëllim monitorimin e gjendjes shëndetësore të nxënësve dhe ngritjen e vetëdijes për rëndësinë e kujdesit ndaj shëndetit, duke kontribuar kështu në një zhvillim më të shëndetshëm të gjeneratave të reja.

Në fund, i pari i Suharekës ka uruar sukses për ekipet mjekësore që do të jenë të angazhuara në këtë proces, duke vlerësuar rolin e tyre në ruajtjen dhe përmirësimin e shëndetit të nxënësve.