Kosovë – Formohet një subjekt i ri politik konservator, i udhëhequr nga Ferid Agani

Prishtinë, 18 korrik 2025

Skenës politike në Kosovë i është shtuar një subjekt i ri me orientim konservator: “Forca e Re Kombëtare”. Iniciativa është ndërmarrë nga ish-ministri Ferid Agani, ndërsa themelimi i saj është konkretizuar përmes mbledhjes konstitutive të Këshillit Organizativ, të mbajtur më 14 dhe 17 korrik.

Sipas njoftimit për media, mbledhjet janë zhvilluar në një atmosferë serioze dhe bashkëpunuese, me pjesëmarrjen e figurave të njohura nga jeta publike, akademike dhe politike, si dhe qytetarë të interesuar për një alternativë politike me vlera të theksuara morale, kulturore dhe shtetformuese.

Gjatë mbledhjeve u morën disa vendime kyçe:

U miratua Rregullorja e Punës së Këshillit Organizativ;

U zgjodh kryetari i Këshillit dhe u konstituuan strukturat drejtuese;

U emërua përfaqësuesi ligjor për paraqitje në Komisionin Qendror të Zgjedhjeve;

U vendos për themelimin e grupeve të punës për hartimin e dokumenteve themelore, si Statuti, Programi Politik, Platforma Ideologjike, Strategjia e Komunikimit Publik dhe ajo Zgjedhore.

Po ashtu, u miratua “Deklarata Politike e Mbështetjes”, që përqafon vlera si familja, tradita, morali, identiteti kombëtar dhe liria individuale në kuadër të rendit kushtetues dhe demokratik.

Një nga pikat më të rëndësishme ishte bashkimi i Partisë së Drejtësisë me grupin politik të intelektualëve “Integriteti”, me synimin për të krijuar një subjekt të përbashkët mbi baza të barazisë, që do të bashkojë përvojën 25-vjeçare të Partisë së Drejtësisë me vizionin e ri të partnerit të saj.