Ambasada britanike zbulon temat e bisedimeve të Karen Pierce me liderët politikë të Kosovës

Prishtinë, 16 Korrik 2025

Ambasada britanike tregon për temat e diskutimeve që Karen Pierce pati me liderët e partive politike të Kosovës

Ambasada britanike në Kosovë ka njoftuar sot, më 15.07.2025, për temat e bisedave ndërmjet të Dërguarës së Posaçme të Mbretërisë së Bashkuar për Ballkanin Perëndimor, Karen Pierce, me liderët e partive politike kosovare.

Ndër temat e diskutimit me krerët e LVV-së, PDK-së, LDK-së dhe AAK-së, sipas Ambasadës kanë qenë edhe përgatitjet për Samitin e Procesit të Berlinit, i cili do të mbahet në tetor në Mbretërinë e Bashkuar.

Po ashtu, sipas njoftimit, Pierce ka thënë se është e rëndësishme që Kosova të formojë sa më shpejt një qeveri që do të punojë në të mirë të të gjithë qytetarëve të saj.

“Diplomatja britanike ka nënvizuar gjithashtu nevojën që Kosova të tregojë në mënyrë të dukshme përkushtimin e saj si një shtet shumetnik dhe ka inkurajuar vazhdimin e angazhimit në dialogun e lehtësuar nga Bashkimi Evropian”- thuhet në njoftim.

Po ashtu në komunikatë theksohet se Pierce është takuar edhe me komandantin e KFOR-it, gjeneralmajor Enrico Barduani, me të cilin ka ritheksuar mbështetjen e Mbretërisë së Bashkuar për KFOR-in, duke e cilësuar këtë mision si kyç për ruajtjen e sigurisë në rajon.

Kryeministri në detyrë i Kosovës, Albin Kurti, në mbrëmjen e 14 korrikut 2025 pati darkë pune me të Dërguarën e Posaçme të Mbretërisë së Bashkuar për Ballkanin Perëndimor Karen Pierce.

Darka e punës u mbajt në rezidencën e Ambasadës së Mbretërisë së Bashkuar.Zyra e Kryeministrit njofton se Pierce vjen në Kosovë për herën e dytë, pasi që në prillin e kaluar ishte pjesë e delegacionit të sekretarit të Shtetit për Punë të Jashtme të Mbretërisë së Bashkuar David Lammy.