Barduani pret emisaren britanike, diskutojnë për sigurinë dhe dialogun Kosovë-Serbi

Prishtinë, 15 Korrik 2025

Komandanti i KFOR-it, gjeneral major Enrico Barduani, ka pritur të martën në selinë e këtij misioni në Kosovë emisaren britanike, Karen Pierce.

Sipas njoftimit zyrtar të KFOR-it, gjatë takimit është diskutuar gjendja aktuale e sigurisë në Kosovë dhe procesi i dialogut me Serbinë, i ndërmjetësuar nga Bashkimi Evropian.

“Takimi u fokusua kryesisht në situatën aktuale të sigurisë në Kosovë dhe në dialogun Beograd–Prishtinë të lehtësuar nga BE-ja. Në këtë kontekst, Gjeneral Major Barduani ritheksoi përkushtimin e vazhdueshëm të KFOR-it për një ambient të sigurt dhe të qetë për të gjitha komunitetet.”.
Ai gjithashtu ka vlerësuar lartë angazhimin e kontingjentit britanik në kuadër të KFOR-it dhe ka shprehur mirënjohje për kontributin e vazhdueshëm të Mbretërisë së Bashkuar për paqen dhe stabilitetin në rajon.

“Gjatë vizitës, Pierce shprehu mirënjohjen për përpjekjet e vazhdueshme të KFOR-it në ruajtjen e sigurisë dhe në mbështetjen e stabilitetit për të gjitha komunitetet në Kosovë”, thuhet në njoftim.