Arrestohet një person, dyshohet se kreu krime lufte në Matiçan

Prishtinë, 23 mars 2026 17:36

Policia e Kosovës dhe Prokuroria Speciale kanë bërë të ditur se është arrestuar të hënën një person, i dyshuar për krime lufte në Kosovë.

Z.S, dyshohet se gjatë periudhës 1998-1999, si pjesë e një grupi paramilitar të forcave serbe, ka kryer krime lufte në Matiçan.

“Hetuesit policorë nga Drejtoria për Hetimin e Krimeve të Luftës, me urdhër të Prokurorisë Speciale të Republikës së Kosovës, kanë arrestuar Z.S., nën dyshimin për kryerjen e veprës penale “krime lufte kundër popullsisë civile”. I pandehuri Z.S., si pjesë e një grupi paramilitar të forcave serbe, dyshohet se ka kryer krime lufte në fshatin Matiçan, Komuna e Prishtinës gjatë periudhës kohore 1998-1999. Brenda afatit ligjor, sipas Kodit te Procedurës Penale, Prokuroria Speciale do të paraqesë në Gjykatën Themelore te Prishtinës, Departamenti Special kërkesën për paraburgim”, thuhet në komunikatën e përbashkët të Policisë dhe Prokurorisë.