Oda Ekonomike e Kosovës kërkon masa fiskale për të ndaluar rritjen e çmimeve të naftës

Prishtinë 18 Mars 2026 15:12

Oda Ekonomike e Kosovës ka kërkuar ndërhyrje të menjëhershme fiskale, në mënyrë që të ndalohet rritja e çmimit të derivateve të naftës.

Përmes një komunikate për media, OEK theksoi se rritja e çmimeve të derivateve të naftës ka ndikim të drejtpërdrejtë në inflacion, duke rritur kostot e prodhimit dhe duke ulur standardin e jetesës së qytetarëve, si dhe zhvillimin e përgjithshëm ekonomik.

Për këtë arsye, Oda Ekonomike e Kosovës propozoi që Qeveria të marr masa konkrete fiskale, si: Ulja e tatimit mbi akcizën për derivatet e naftës dhe lirim i përkohshëm nga Tatimi mbi Vlerën e Shtuar (TVSH) për derivatet e naftës, apo së paku duke ulur normën e Tatimit të Vlerës së shtuar.

Këto masa, sipas OEK, do të kontribuonin në uljen e çmimeve për bizneset prodhuese dhe qytetarët, duke lehtësuar barrën financiare dhe duke stabilizuar tregun.

“Tatimi mbi vlerën e shtuar është një tatim i konsumatorit dhe i kombinuar me akcizën, I cili ka ndikim të drejtpërdrejtë në çmimin më të ulët final të karburantit. Vlen të theksohet se masa të ngjashme kanë filluar të zbatohen në disa vende të Bashkimit Evropian dhe të rajonit, me qëllim frenimin e rritjes së mëtejshme të çmimeve, e cila krijon vështirësi për bizneset dhe rrit rrezikun e varfërisë për qytetarët”.