Maqedonci: Mbi 1 miliard euro për modernizimin e ushtrisë së Kosovës

Prishtinë, 13 mars 2026 21:00

Ministri i Mbrojtjes, Ejup Maqedonci, ka deklaruar se Ministria e Mbrojtjes është e përkushtuar për të përshpejtuar modernizimin e kapaciteteve mbrojtëse dhe se gjatë katër viteve të ardhshme janë planifikuar investime mbi 1 miliard euro për avancimin e kapaciteteve luftarake, ndërtimin e infrastrukturës mbrojtëse dhe zhvillimin e industrisë vendore.

Maqedonci ka theksuar rëndësinë e panairit BEDEX 2026 në Bruksel si një platformë për bashkëpunim dhe përforcim lidhjesh në fushën e mbrojtjes.

“Gjatë këtyre dy ditëve në Bruksel në margjina të panairit takova Shefin e Mbrojtjes të Forcave të Armatosura të Belgjikës, Gjeneral Frederik Vansina, si dhe zhvillova takime me përfaqësues të kompanive të industrisë së mbrojtjes për të diskutuar mundësitë e bashkëpunimit në furnizimin e ushtrisë së Kosovës me sisteme dhe pajisje moderne ushtarake, si dhe për të eksploruar potencialin për bashkëprodhim dhe investime në zhvillimin e industrisë së mbrojtjes në vendin tonë”, ka deklaruar ai.

Ai ka theksuar se Kosova synon të kontribuojë “në forcimin e sigurisë rajonale dhe euroatlantike, duke thelluar bashkëpunimin me partnerët dhe aleatët ndërkombëtarë”, duke nënvizuar rëndësinë e zhvillimit të kapaciteteve të ushtrisë për një të ardhme më të sigurt për vendin dhe rajonin.

Maqedonci ka vlerësuar se panaire si BEDEX 2026 ofrojnë mundësi për ndërtimin e partneriteteve afatgjata dhe për qasje në teknologjitë më të avancuara, që do të forcojnë kapacitetet e ushtrisë së Kosovës dhe do të mbështesin zhvillimin e industrisë vendore të mbrojtjes.