Rreth 2 milionë euro dëme nga vërshimet e janarit në Drenas

Drenas, 11 mars 2026 08:29

Komisioni Komunal për vlerësimin e dëmeve nga fatkeqësitë natyrore në Komunën e Drenasit ka dorëzuar raportin përfundimtar lidhur me dëmet e shkaktuara nga vërshimet e muajit janar të këtij viti.

Zëdhënësi i Komunës së Drenasit, Bekim Dobra, ka thënë për Veritasinfo se pas një pune të gjatë dhe vlerësimit në terren, raporti përfundimtar dhe dosja e plotë janë dorëzuar pranë Komisionit Qeveritar në Agjencinë për Menaxhimin e Emergjencave (AME).

“Pas një pune të gjatë dhe të përkushtuar, sot Komisioni Komunal për vlerësimin e dëmeve nga fatkeqësitë natyrore dhe fatkeqësitë e tjera ka dorëzuar raportin përfundimtar dhe dosjen e plotë pranë Komisionit Qeveritar në Agjencinë për Menaxhimin e Emergjencave”, është shprehur Dobra.

Sipas tij dëmet e shkaktuara nga vërshimet kapin vlerën mbi 1.5 milionë euro në ekonomi familjare, bujqësi dhe biznese, ndërsa në infrastrukturën publike – përfshirë rrugët, urat dhe lëshesat – dëmet vlerësohen rreth 400 mijë euro.

Me dorëzimin e këtij raporti përmbyllet procesi i vlerësimit në nivel komunal, ndërsa procedura tashmë kalon në nivel qeveritar, ku pritet të vazhdojë shqyrtimi dhe procedimi për kompensimin financiar të qytetarëve që pësuan dëme nga vërshimet.

Komuna e Drenasit ka falënderuar anëtarët e Komisionit Komunal për punën profesionale dhe angazhimin gjatë gjithë procesit të vlerësimit, si dhe qytetarët për bashkëpunimin dhe mirëkuptimin e treguar gjatë kësaj periudhe.