Britania e tërheq stafin nga Ambasada në Iran

Prishtinë, 27 shkurt 2026 19:31

Britania e ka tërhequr stafin nga Ambasada e saj në Teheran, kur rreziku për sulme amerikane ndaj Iranit ka nxitur paralajmërime nga disa shtete për qytetarët e tyre në Lindjen e Mesme.

Zyra e Jashtme e Mbretërisë së Bashkuar tha se ky veprim është “masë paraprake e kujdesit” dhe se Ambasada e saj në kryeqytetin iranian vazhdon që të operojë nga distanca. Ky dikaster gjithashtu i përditësoi udhëzimet për udhëtime, duke këshilluar që drejt Izraelit të realizohen “vetëm udhëtimet esenciale”, raporton televizioni BBC.

Ndërkohë, Ambasada e Shteteve të Bashkuara në Izrael të premten u tha një pjese të stafit jo-urgjent dhe familjeve të tyre se mund të largoheshin nga ky shtet.

Këto masa vijnë një ditë pasi Uashingtoni dhe Teherani zhvilluan bisedime që u panë gjerësisht si përpjekje e fundit për të shmangur një luftë për shkak të ambicieve bërthamore të Iranit.

Një numër i shteteve të tjera, përfshirë Kinën, Indinë dhe Kanadanë, u kanë thënë shtetasve të tyre që të largohen nga Irani sa më shpejt që është e mundshme për shkak të rrezikut për veprime armiqësore.

Presidenti amerikan, Donald Trump, ka kërcënuar me veprime ushtarake kundër Iranit, nëse ky vend nuk pajtohet për një marrëveshje rreth programit të vet bërthamor.

Ai e ka urdhëruar grumbullimin më të madh të forcave ushtarake amerikane në Lindjen e Mesme që nga pushtimi i Irakut më 2003, ndërsa Irani është zotuar se do t’i kundërpërgjigjet me forcë ndonjë sulmi të mundshëm.