Lufta Rusi-Ukrainë hyn në vitin e pestë, sulme të reja në Zaporozhnje

Prishtinë, 24 shkurt 2026 08:44

Lufta mes Rusisë dhe Ukrainës ka hyrë në vitin e pestë, ndërsa autoritetet ukrainase raportojnë për sulme të reja ruse me dronë dhe raketa në Zaporizhzhia dhe zona të tjera të vendit.Sipas zyrtarëve lokalë, pesë persona, përfshirë një fëmijë, u plagosën pas goditjes së disa objekteve infrastrukturore. Një dron shkaktoi zjarr të madh pranë një pallati banimi. Në Mykolaiv, shtatë policë mbetën të plagosur nga një shpërthim, shkruan Aljazeera.

Në katërvjetorin e pushtimit, presidenti ukrainas, Volodymyr Zelenskyy deklaroi se homologu i tij rus, Vladimir Putin, nuk i ka arritur objektivat e luftës dhe se Ukraina do të vazhdojë përpjekjet për një paqe të drejtë.Sipas një raporti të International Crisis Group, Rusia ka pësuar rreth 1.2 milion humbje që nga viti 2022, ndërsa humbjet ukrainase vlerësohen deri në 600 mijë. Ndërkohë, Banka Botërore vlerëson se kostoja e rindërtimit të Ukrainës mund të arrijë në 588 miliardë dollarë gjatë dekadës së ardhshme.

Përpjekjet diplomatike për t’i dhënë fund luftës kanë vazhduar pa rezultat konkret, ndërsa vijat e frontit mbeten kryesisht të pandryshuara.